Þetta var dáldið löng bloggpása, kannski get ég ekkert frekar skrifað blogg heldur en þegar ég var að rembast við að halda dagbók þegar ég var tíu ára. Við sjáum bara til, gallinn er bara að þá hættir fólk að nenna að kíkja á síðuna manns ef maður er latur að uppfæra...
Eins og líklegast flestir hafa gert sér grein fyrir, þá eru jólin að koma, og við HJÓNIN ætlum að sitja sem fastast í okkar heimabæ og halda ítölsk jól. Það verður ábyggilega skrítið, erum bæði með stein í maganum yfir því, en svona er þetta þegar maður er að reyna að vera stór og standa á eigin fótum! Þannig að í stað rjúpna verður fashani á aðfangadagskvöld, og bara parmaskinka eða salumi í stað hangikets á jóladag! Annars erum við hálf efins með fashanann, maður þarf nefninlega sjálfur að hálshöggva hann, og við erum svo lítil í okkur að hvorugt okkar þorir því! Hugsa sér að sjá slagæðarnar í hálsinum af dýrinu sem maður ætlar að smjatta á á aðfangadagskvöld...
Hingað á heimilið var keyptur Volkswagen Golf GTI síðastliðinn mánudag, og erum við á einni viku búin að keyra hann 1000 km! Það tók okkur aðeins tvo og hálfann mánuð að kaupa bílinn, þ.e.a.s. frá því að við sóttum um þartilgerða pappíra og þangað til að við fengum þá í hendurnar. Sumir á Íslandi myndu segja að það væri langur tími, en ég skal sko segja ykkur það að hér í Parma er það mettími, og ég held að afgreiðslufólkinu hjá bænum sem sjá um svona skemmtilegheit, hafi langað til að gera okkur að heiðursborgurum fyrir vikið! Anyway, þá virkar bíllinn og gott betur, fórum í Ikeabíltúr, í Parmabíltúr, Gissur fór til Verona, og svo fórum við í eftirminnilegt matarboð í Milano hjá Ingibjörgu verðandi innanhúsarkitekt. Milano er alveg ótrúlega grá borg á veturna, mér fannst ég komin í paradís þegar við keyrðum inn í Parma og sáum öll trén og GOSBRUNNINN okkar sem er hér rétt hjá. Já, það er nú betri þjónusta í Parma heldur en í Kópavogi, við vorum rétt flutt í bæinn þegar Sindaco (borgarstjórinn) ákvað að setja gosbrunn í hverfið okkar. Þar sem ég og mínir vinir höfum næstum alltaf búið í Kópavogi, finnst mér þetta lélegt af bærjarstjóra Kópavogs að vera ekki ENN búinn að reisa gosbrunninn góða sem við báðum hann um fyrir löngu. Enda er Parma soddan ríkisbubbabær að það var ekki við öðru að búast að þeir gerðu vel við sína.
Það er aldrei að vita nema ég líti hingað aftur inn og skrifi smá pistil, sjáum bara til!
Sigrun