FRAMHALDSMYNDIR

Það er skrýtið hvað kvikmyndir sem eru nr. 2 eru alltaf lélegar. Ég horfði á The Edge of Reason, eða Bridget Jones nr. 2 í gær og varð fyrir talsvert miklum vonbrigðum, sérstaklega vegna þess að ég skemmti mér konunglega við lestur bókarinnar. Það sem fer mest í taugarnar á mér núna við bíómyndir er Ally McBeal syndrómið, þ.e.a.s. þegar helmingur myndarinnar fer í tökur af byggingum og umferð og léleg poppmúsík undir, svona eins og til að teygja lopann. Þessvegna fannst mér Collateral t.d. alveg sérlega léleg fyrir utan hvað handritið var ófrumlegt og margnotað.
Ég er búin að komast af því hversvegna ég var með 3 áttundir og þríund í raddsvið um daginn, en þar hjálpuðu steratöflurnar sem ég tók við lungnabólgunni til! Ég ætti kannski að fara að byrja á sterum, þá stækka jú allir vöðvar og meðal annars vöðvarnir í kringum raddböndin...freistandi valkostur, ég held að testósterón yrði fyrir valinu, ég hef jú alltaf verið hrifin af mezzósóprönum með bringuhár!
Verið sæl
núrgiS

KRONIKA SÍÐUSTU DAGA...

Já, það gerist ýmistlegt hér á Via Zarotto 12. Vissulega var sjokk fyrir íbúa hússins heimsókn sporðdrekans hér um daginn, og eru þeir enn að jafna sig á því, hver veit nema næst komi úlfar, en þeir lifa jú í þessu landi (reyndar í Chianti, en úlfar eru seigir ferðamenn og túrismi er alltaf að verða meiri og meiri hér í Parma).

Húsbóndinn er nú orðinn reglulegur gestur í söngtíma hjá Maestro Jóhannsson við Gardavatn, en saman eru þeir að vinna eitthvað svona sem tenórar gera saman bak við luktar dyr og við hin reynum bara að ímynda okkur hvað gerist. Húsfrúin er að jafna sig af tæringunni og fór í fyrsta líkamsræktartímann í gær við litla kátínu lungnanna. Það tilkynnist hér með að húsfrúin hefur 3 áttundir og þríund í söngsvið og er hún mjög stolt af því.

Matthildur litla hefur verið í gæzlu hjá okkur undanfarið og gengur vel að aga hana til, sem betur fer sjá foreldrar hennar ekki hverslags hörku hún er beitt en þau skilja einmitt ekki þessar línur...híhíhí á þau!

Fóru Flóvenzhjónin í matarboð til Padova síðustu helgi, en þar voru gestgjafar þau Roberto og Anna sem eru einmitt söngvarar. Það var voða gaman og buðu þau m.a. upp á hveitilengjur með lambaketi sem er rómverskur réttur, og var sérlega gaman að bragða á framreiðslu rómverja á þessu séríslenska keti. Þetta umrædda kvöld var mikið snætt, drukkið styrkt rauðvín og grappa og var umræðuefni kvöldsins söngur og túrismi (ekki þó úlfavandamálið).

Eins og kannski lesendur vita eru þau Sigrún og Gissur ekki miklir stuðningsmenn hundahalds í borg, og gafst þeim einstakt tækifæri að vera andstyggileg í garð hundaeigenda þegar annar sjefferhundurinn í baklóð hússins (sumir kannast við þennann rakka, annar í geltdúóinu mikla) mætti niður í bílageymslu aleinn og yfirgefinn einmitt þegar hjónin opnuðu hliðið, og viti menn, voffi slapp út og týndist fram á kvöld! Síðan hefur hann verið lokaður inni greyið...
Lýkur hér kroniku síðustu daga.
núrgiS

Ævintýri Slöngumannsins..................

Já gott fólk það var aðfaranótt fimmtudagsins 7. apríl. Klukkan var nýslegin tólf á miðnætti og slöngumaðurinn(einnig þekktur sem Gissur Guli) var að búa sig undir að taka á sig náðir á heimili sínu í Parma borg óttans. Allt var klappað og klárt, búinn að pissa, bursta, slökkva flest ljós og þá var aðeins eitt eftir. En þetta eina smáatriði reyndist slöngumanninum afdrifaríkt.
Það ískraði í hjörum svalahurðarinnar þegar daufir ljósgeislar úr stofunni skáru þykkt myrkrið þessa nokkuð hlýju og röku nótt í Parma. Í fyrstu virtist allt eðlilegt og slöngumaðurinn teygði sig eftir hlerunum sem áttu að smella fyrir svalahurðina. En skyndilega var eins og slöngumaðurinn hafi fengið hugboð snéri hann ser við og sá þar hvar á að giska 3ggja metra skrímslasporðdreki (scrimslus scorpiones) hafi tekist að læðast að honum. Nú voru góð ráð dýr og engan tíma mátti missa. Augnablikið fraus og slöngumaðurinn af mikilli reynslu sinni í viðureignum við óargadýr stóð grafkyrr og horfði í augun á skrímslasporðdrekanum. Áður en að nokkur vissi af ultu þeir til og frá á svölum slöngumannsins og fyrir einhverja guðlega forsjá tókst honum að skreppa undan eituroddi ófreskjunnar og skjótast inn fyrir svaladyrnar og skella á eftir sér. En baráttunni var ekki lokið þarna því að slöngumaðurinn gengur ekki frá hálfkláruðu verki. Hann vippaði sér að opinni vopnageymslunni og greip það sem að hann hafði vonað allra vegna að þurfa aldrei að nota aftur. En það var sérstyrktur grámattur ofur(design)flugnaspaði. Slöngumaðurinn laumaðist að þessu sinni bakvið skrímslasporðdrekann og veitti honum hvert höggið á fætur öðru og minnstu mátti muna að ýmist beittar klær eða banvænn eituroddur næðu honum.
Undir morgun þegar morgunroðinn reis í austri lá skeppnan í valnum. Enn og aftur hafði Slöngumaðurinn lagt að velli eina af hræðilegustu skepnum jarðar.

Gissur Guli

RICCARDO MUTI VERSUS MARKÚS ÖRN ANTONSSON

Nú verður fjallað um pólítískt siðferði.
Fyrir þá sem ekki vita er Riccardo Muti (mætti þýða Ríkharður Mállausi) einn frægasti óperustjórnandi samtímans, og aðalstjórnandi Scalaóperunnar síðustu 19 árin. Scala er óperuhúsið í Milano og Milano er á Ítalíu og margir tengja Ítalíu við hina illræmdu Mafíu. Svo er mál í vexti að Mállausi ku vera einstaklega mikill harðstjóri eins og oft tíðkast hjá hljómsveitarstjórum, og fara af honum sögur um kvensemi fram úr hófi (hann er giftur til margra ára henni Cristinu vinkonu Gissurar og eiga þau 3 uppvaxin börn) í skjóli Scalaóperunnar. Margt væri hægt að segja um Mállausa, hann hefur bæði gott og illt gert óperuhefðinni, en út í slík tækniatriði verður ekki farið hér á þessari síðu. Þann 16. mars samþykktu rúmlega 700 starfsmenn Scalaóperunnar vantraustsyfirlýsingu á Mállausa, 3 voru á móti henni og 2 sátu hjá. Vildu starfsmenn meina að hann réði óhæfann starfsmann í ábyrgðarstöðu innan fyrirtækisins. Mállausi varð mjög sár, fannst hann ekki eiga þetta skilið og talaði um pólítískt einelti og annað slíkt, en horfðist þó í augu við staðreyndir og sagði af sér í kjölfarið. Vel gert, Mállausi!
Nú hef ég dálítið fylgst með framgangi mála hjá öðru ríkisreknu batteríi, á eyju við norðurheimskautsbaug þar sem siðferði á að vera til fyrirmyndar og engir mafíósahættir stundaðir. Mér skilst að þetta batterí sé kallað Ríkisútvarpið, og að útvarpsstjóri hafi fengið svipaða vantraustyfirlýsingu og Mállausi á sig vegna ráðningar fréttastjóra. Útvarpsstjóri lét öllum illum látum í viðtalsþætti hjá fyrirtækinu sem hann stýrir, og lokaði augunum fyrir vandamálinu, virtist ekki detta í hug að endurskoða hæfni sína sem útvarpsstjóri.
Hvar eru mafíósasiðir nú stundaðir?
Lifið heil,
núrgiS.

SHREK

Við Gissur og Biggi horfðum á Shrek í gær. Hún var skemmtileg, en hvað er grínið með músíkina? Þetta var þvílíkt antiklímax að hafa svona ameríska bíómyndareynaðveratöffsíbylgju að ég er bara eftir mig. Svo fannst mér asnalegt að láta Mike Myers tala með enskum hreim vegna þess að honum tókst það ekki. Eddie Murphy fór hinsvegar á kostum sem asnalegi asninn.
Góðar stundir,
núrgiS.
p.s. næst á dagskrá er Finding Nemo.
p.p.s. Fantasia og Mowgli (Jungle Book) eru ófáanlegar á söludvd. Hvert er heimurinn að fara?

"Amami Alfredo"(væmnissímar fiðlur undir)...

...eins og duglegir óperuunnendur vita þá eru þetta byrjunarorð dúettsins í sveitaþættunum (2. þáttur) úr La Traviata e. Verdi þar sem hún Violetta yfirstéttargleðikona er að deyja úr tæringu. Nú væri gott að hafa lungun hennar Violettu, því að ég er með svona næstumþví tæringu eða þannig, aumingja ég er komin með væga lungnabólgu og þarf því annaðhvort að reyna að syngja "Amami Paolo" (Elskaðu mig Páll) eða bara að hanga inni og bíða þetta af mér. Ég skil vel að Violetta hafi dáið vegna þess að það er svo ansi erfitt að syngja þennann dúett með tæringu, og hún hefur bara ofgert sér, stelpan. Bæ ðe vei, þá hef ég aldrei grátið yfir neinni bók nema Kamelíufrúnni eftir Dumas yngri, en á þeirri sögu er Hin Glataða (La Traviata) byggð á. Kannski var bókargráturinn um árið vísbending um að sjálf ætti ég hættu á að deyja úr tæringu ef ég legði í dúettinn. Bréfasenan í minni Traviata yrði þá meira eins og í myndinni You've got mail heldur en hjá Verdi þar sem hún situr afar rómantísk í skrúðgarðinnum og skrifar kveðjubréf til Alfreðs, því að ég sæti bara með hor inní svefnherbergi með órómantískann bjarma tölvuskjáarins. Sei sei.
Annars var mjög gaman á spítalanum í gær þar sem ég var rannsökuð fyrir öllum mögulegum og ómögulegum sjúkdómum, ég var aðeins í tvo og hálfann tíma inni hjá lækninum. Ég held að samlöndum mínum á Íslandi hefði ekki staðið á sama um lúkkið á spítalanum, því að hér í Parma er lítið um E.R. effekta eins og tíðkast í Reykjavík city. Enginn með rammann teikavei kaffibolla í hönd né svona myndapassa eins og í sjónvarpinu, bara beisikk innrétttingar komnar til ára sinna og rússneskar ljósakrónur, og síðast en ekki síst var ekki eins undirmannað og allstaðar við norðurheimsskautið, svo að mér var ekki hent út í flýti með lyfseðil í hönd eins og oft kemur upp í hinni erilssömu Reykjavík. Best fannst mér samt útigangskonan sem ráfaði um lungnaspítalann...reykjandi.
Lifið heil,
núrgiS.
p.s. þeir sem eiga æpod eru montrassar og hrekkjusvín.

Enn meira af andlegum málum.............

Sólin skein í heiði og fuglarnir sungu. Við Sigrún vöknuðum tilbúin að takast á við nýtt hlutverk.
Það var sem sé í dag þann 3. apríl 2005 sem að við urðum "guðforeldrar" hennar Matilde litlu. En
eftir u.þ.b. mánaðar samningaþref við Guð og Jésú og kirkjuna og presta var það loks ákveðið að við lútersku "heiðingjarnir" sinnum þessu hlutverki en verðum ekki skráð fyrir því í bókum hins rétta kaþólska guðs. Athöfnin hófst fyrir utan kirkjuna og seinna færðist leikurinn inn þar sem að allt fór vel fram. Allir voru að vanda ánægðir og Matilde litla sofnaði vært eftir að hafa rekið upp nokkrar vel valdar rokur á meðan að athöfnin fór fram.
kv. Gissur Guli

In nomine padre, filius et spiritus sanctus.............

Gott fólk Jóhannes Páll Páfi II er DÁINN!!
Já páfi lést í vadikaninu sínu núa í kvöld kl 21:37 að staðar tíma í Róm(Vatikaninu)
Nú eru góð ráð dýr, því að eins og glöggir lesendur hafa tekið eftir þá skrifaði ég einmitt grein um að bjóða páfanum trúarlegt hæli á íslandi og að það ætti að veita honum íslenskan ríkisborgararétt. Þar sem sé byrjuðu vandræðin því að ég gerði mér ekki grein ryrir að auðvitað er bloggsíða okkar Sigrúnar undir ströngu eftirliti Vatikansins. Í kjölfar greinar minnar og auðvitað andláts páfans hef ég flæklst inn í einn stóran lygavef sem að ég á eftir að verða í vandræðum að losa mig úr því að Vatikanið hefur bendlað mig og alla íslensku þjóðina við hin "DULARFULLA" dauðdaga Páfa!!
Ég hef til að mynda orðið var við kuflklædda herramenn við hvert fótmál og er þess full viss að Páfanns menn eigi eftir að láta til skara skríða.
Ef þannig fer að þið heyrið ekkert í mér næstu daga er mín eina ósk sú að einhver hafi samband við Utanríkisráðuneytið og biðji Davíð Oddson að frelsa mig undan Kaþólskuni.
kv. Gissur Guli